قصائد البوم خلني ارحل للشاعر المبدع طارق المحياس

بسم الله الرحمن الرحيم
السلام عليكم ورحمه الله وبركاته



.
.
.
.
.
.
.


بعد طول إنتظار أهديكم قصائد الشاعر طارق المحياس من البومه الجديد
لعام / 2010 ( خليتني أرحل ) والذي يحتوي 13 قصيده من أجمل القصائد
وأروعها ..












مبتلي بك

كيف ماتبغيني بس أزعل عليك إلا بزعل وأقلب الدنيا عليك
هالدقيقه الحين إما أنك تجيني أو قسم بالله لا أخربها وأجيك
كيفك أتصرف أبا أشوفك تعال بحضنك بتنفسك بلمسك ايديك
عاد أنا دقت في راسي أني اشوفك بلتقيك الحين يعني بلتقيك
حس فيني مابقت فيني مشاعر حس فيني الله يرحم والديك
لو تبيني أرتجيك و أتوسل والله لأتوسلك والله لأرتجيك
ماشي يا عمي أنا أرجوك تكفى كان لي عندك قدر قول أحتريك
بأي طريقه الحين أنا ودي اشوفك مابقى فيني صبر أفهم أبيك
كيف أبصبر وأنت في كل الزوايا وين ماطالع خيالي بس فيك
من هنا وهناك وفي كل الأماكن لعنبوك القلب ذايب مهتويك
وأنته تتغلى وتشكي لي ظروفك حتى أنا عندي ظروف الله يهديك
يا معيشني مابين أصبر ويمكن وأنته تدري مالك بقلبي شريك
يارجاي وسؤ ظني وأعتقادي لاتردني عاد دامي مشتريك
مبتلي بك ادري اني مبتلي بك وادعي الله مثلي انه يبتليك
لاتعذر غير مقبوله أعتذارك بلتقيك الحين يعني بلتقيك
ياتجيني الحين دامه بأختيارك أو قسم بالله لاخربها وأجيك















فارس عوض

فارس عوض عطني من القلب رباه .. على هذيك اللي ذبحتنا بحلاها
سمعني مش ممكن وسمعني الله .. لغت حضور اللي مشو من وراها
فتنه وتمشي بكل ثقه ويل ويلاه .. ماكن في الدنيا يا فارس سواها
شفت اللي ماشي وهو عارف مزاياه .. تمشي بثقه تدري ان ربي عطاها
كأنها اللي اختارت جمالا تمناه .. كأنها اللي اختارت حسنها وحلاها
تدري اللي يلمحها يردد يا محلاه .. تدري انها حلوه وعارفه مستواها
مشت وعدت حاورت سجلت آه .. في قلوب كل اللي تمنو رضاها
اقسم بربي كأنها تلعب مباراه .. تحكيم والجمهور كله معاها
عليها قلب الله مقساه مقساه .. لبؤه تمشي والثعالب وراها
ماتلتفت ماتبتسم وشو معناه .. مغروره دلوعه يا فارس بلاها
ماهمها سلطان او مال او جاه ..وماهمها إللي بسنة الله بغاها
بطرانه ماهمها إللي عاش بمعاناه .. وهي السبب لكن اقولك فداها
والله يحق لها تمادى وتخشاه .. كل من يحاول تبتسم له شفاها
ماغازلت ما أغرت بعضة شفاه .. ماحطت صبعها بفمها حشاها
تستاهل أني أحترمها والله .. تستاهل الدعوه لها من وراها
الله يحقق كل ما هي تمناه .. والله يخليها لكل اللي يباها
تسلم ايدين اللي على العز رباه .. والله يوفقها ويسدد خطاها













رد لي

يعني شسوي لك عشان أنته ترجع بح صوتي من كثر ما قمت اناديلك تعال رد لي يا أبن الحلال
ياخي مابي شيء منك كل همي بس اشوفك ياللي ذبحتني ظروفك لابو حبك لابووعدك
حس فيني لابو جدك والله اني في غيابك حالتي تصعب علي دنيتي بعدك خلت من كل شيء
لا ورود ولا زهور لا احاسيس وشعور حتى اصحابي وربعي حسو بحزني ودمعي
وانته عندك من يسليك بغيابي وانا ماعندي سوى همي وعذابي
ليه غدى قلبك يهودي ليه تتناسى عهودي
حس فيني يا رقيق العاطفه المشاعر في غيابك خايفه
قلي بس يعني شسوي لك عشان تحس وترجع بح صوتي من كثر ماقمت اناديلك تعال رد لي يا ابن الحلال
والله اني في غيابك ادّعي اني سعيد بس انا ماني سعيد همي كل ماله يزيد يا برودك يا عنيد
ماشي لاترجع عشاني اني احبك رد واكسب فيني بس ياخي اجر وعن غيابي ما ابي منك عذر
إيه ابيك وأرخص الدنيا عشانك وأشتريك واللي يرحم والديك رد لي روحٍ غدت منك وفيك عايشه بحبك على الذكرى تبيك
قلي بس يعني شسوي لك عشان تحس وترجع بح صوتي من كثر ماقمت اناديلك تعال رد لي يا ابن الحلال
تعتقد اني بسهوله راح اتناسى الوداد يا جماد او تظن اني ابنسى لو تطول في البعاد
مستحيل انا اصلا في غيابك صار ليلي ماهو ليل والله اني ما انام لجلك اسهر بس عشان اني اترجم لك احاسيسي كلام
يمكن انه تسمعه صدفه ويوصلك الملام غيرك انته لو سمع شعري يردد يا سلام الله الله يسلم احساسك ويسلم هالكلام
كاتبه انته خيال ولا تقصد به احد يحرجوني بسؤال وانا اسكت ما ارد وانته فاهم زين وتدري كل اشعاري عليك
يالله مابي حد في الدنيا كثر ما انا ابيك قلي بس يعني شسوي لك عشان تحس ترجع بح صوتي من كثر ماقمت اناديلك تعال رد لي يا ابن الحلال
بنتظر انك تجيني لو عقب ميه سنه راح اعيش بذكرياتي لين انته تعود يا اغلى من في هالوجود ياللي اخلفت الوعود
الصبر آه يا الصبر والله يذبحني الصبر أرحم إحساسي وقدر من متى وأنا أنتظر طول غيابي كثير وصار يشغلني السؤال
يا ترى في حد غيري مستعد يموت فيك ويرخص أهله وكل ناسه بالعمر هو يفتديك
قلي بس يعني شسوي لك عشان تحس وترجع بح صوتي من كثر ماقمت اناديلك تعال رد لي يا ابن الحلال
شوفني ما اكسر الخاطر بدونك واللي يسلم لي عيونك رد لي حيل محتاجك أبيك بكل دقيقه وكل لحظه قلبي يتوله عليك
فيني روح بلا جسد فيني قلب مايدق فيني آلام وجروح بسئلك وابغيك تجاوبني بصراحه يمكن انه في جوابك تشفي قلبي من جراحه
قول وجاوبني بأمانه قول يا ابن الناس يعني بذمتك ما اشتقت لي ولا أقولك لاتجاوب ماني ناقص يا بعد هالناس صدماتٍ جديده
خلني اخدع نفسي واكذب يمكن الكذبه في هالحاله يا محبوبي مفيده
قلي بس يعني شسوي لك عشان تحس وترجع بح صوتي من كثر ماقمت اناديلك تعال رد لي يا ابن الحلال
دايم اجلس ويا نفسي وانتظر انك في اي لحظه تفاجأني وتجيني تحضن اللي مات بعدك وانكوى بنيران بعدك
تلعب بشعري وتقول اشتقت لي تحلف براسي وتقول ان انته لي وقتها اشعر طلع فيني جناح مدري ليه ودي اطير
وانتهى كل اللي فيني من جراح فيني اتحرر اسير تبتسم وتشوفني وتقول شخبارك حبيبي وانا ارد بكل هدوء
اول اخباري احبك واخر اخباري احبك يعجبك ردي وتقول الله عليك وانا ارد واقول لأ الله عليك
بعد هذا ينتهي حلمي الجميل كنت احلم كنت سارح يا زمن وش فيك قاسي ليه جارح
وترجع الآلام فيني من جديد رد لي الواقع صدمني واكتشفت اني وحيد ورد لي نفس السؤال اللي حيرني كثير
قلي بس يعني شسوي لك عشان تحس وترجع والاجابه مدري وين تهت انا مابين شكي يا حبيبي واليقين
وارجع اسئل من جديد ياللي إحساسك حديد قلي بس يعني شسوي لك عشان تحس وترجع انفطر قلبي
وانا انادي تعال ردي لي يا ابن الحلال












الموت

بعدي عنك يعني الموت يعني اندفن بتراب .. ولكني رغم هذا اببعد عنك وأخليك
صحيح اني ابتعقد وبتحطم يا أعز الأحباب .. ولكنه بيجيني يوم بنسى فيه انا طاريك
انا ماكنت ابي هشيء ولكن كثرة الاسباب .. وانا حاولت اتصبر واقول الله عسى يهديك
ولكن بالفعل مافاد طيبي والرجا بك خاب .. أنا سويت لك كل شيء ولكن مايبين فيك
كثير اشياء خلتني أعيد حساب والف حساب .. وأراجع كل قرارتي وأحط لي حد لتشكيك
ابعرف لي متى بصبر وانا شعري في بعدك شاب .. كفايه والله ما اقدر كفايه الله يخليك
في كل مره اقول اليوم بيبادلني كلام إعجاب .. ويحسسني بحبه لي ويقولي بكل شيء أفديك
ولكن وين أنا ووينه وفعلاً إيش جاب لجاب .. ثمان سنين ولين اليوم ماقد قال أنا اغليك
وأنا إللي بعت له روحي وأرخصت لعيونه رقاب .. واهديته حنان الكون وقلبي كان له تمليك
وأرخصت البشر لجله وقلبي في إيدينه ذاب .. وكم مره أردد له أحبك أعشقك ابغيك
ولا قدر أحاسيسي وحتى ما عملي حساب .. وأنا كنت اسئله دايم أبعرف قول بس شفيك
إذا طبعك تحب تكتم أنا بصبر ولا بنساب .. وصدقني ببيع الكون وكل الناس لجل اشريك
وإذا إن كنت تتحاشى المحبه وتختلق الغياب .. انا برحل وبترك لك فؤادي خله بين إيديك
اقولك ليش ما اقدر يا محبوبي نكون أصحاب .. لأن الغيره تذبحني إذا غيري لمسها إيديك
أموت وأنكوي بناري وتدري ماني بكذاب .. قسم بالله صدق اموت إذا غيري تغزل فيك
أحبك وأعشق ترابك ولو غيري عليه عاب .. شسوي دام انا قلبي يحب أرضٍ تحت رجليك
بعد كل اللي قلته لك تبينا مانكون قراب .. قسم بالله ما اقدر يا إما اجيك او ماجيك
انا من يوم فارقتك يا محبوبي وفرحي غاب .. نستني بعدك الدنيا وانا والله مو ناسيك
انا من كثر ما حاتيك وأفكر بك بديت أهاب .. قسم بالله لاتظن في احد كثري أنا يحاتيك
حلفت انك بتبقالي يا محبوبي أهل وأحباب .. لاتنسى انك حلفت بيوم بالقرآن ماخليك
وهذا أنته نسيت الود والعشره وكل ما طاب .. تزعلني وتصد عني وأنا إللي أعتذر وأرضيك
ترى لو كان حبك ذنب محال القلب عنه تاب .. ياربي لا تآخذني يا قلبي بليز لايغويك
ترى كل إللي قلته لك أبد ماهو جفا و عتاب .. ولكن بس ابي اعرف إذا أني كنت انا اعنيك
ثمان سنين وانا مدري نحن أحباب ولا أغراب .. غريبه والله مدري كيف هشيء يا الغلا يرضيك
اناديك وتصد عني تحط بينك وبيني حجاب .. تصد عني وتحط حجاب طيب ليش وانا اناديك
انا ما ابالغ ان قلت لك بدت تثقل علي ثياب .. بديت اكره انا نفسي وأخاف أكرهك أو أجفيك
انا والله ماودي عقب هالعمر نسد الباب .. ترى كله ولا في يوم عيوني بالهجر تبكيك
انا متحطم ومنهار وكله منك يا أعز الأحباب .. وانا ما أبي يجيني يوم وأنسى فيه انا طاريك
وتدري البعد يعني الموت يعني اندفن بتراب .. تعال ارجوك وادفني في قلبك قبل ما أخليك
ترى هالامر بين يديك تعال الحقني لا ترتاب .. وسو اللي تبي تسويه دام الامر بين إيديك
كثير أشياء خلتني أعيد حساب والف حساب .. وأراجع كل قراراتي وأحط لي حد لتشكيك
وأنا ماكنت أبي هالشيء ولكن كثرة الاسباب .. وأنا حاولت أتصبر وأقول الله عسى يهديك
ابعرف لي متى بصبر وانا شعري في بعدك شاب .. كفايه والله ما اقدر كفايه الله يخليك













عشرة اشياء

كنت اقول انك محال في يوم تتغير عليه .. لو يصير اللي يصير تبقى أوفى هالبشر
لكن العذال لا ماقصروا لا فيك و فيّه .. فرقونا عن بعضنا واقنعوك انه القدر
للأسف انك نويت تروح عني بدون جيّه .. حتى ماودعتني من بعد عشرة هالعمر
هانت العشره عليك الله وكبر يا الخطيّه .. والله حاولت أعذرك بس وين اطلع لك عذر
كم أنا ضحيت لأجلك كم تحملت الأسيّه .. كم أنا عانيت منك كم تحملت الهجر
كم توعدني تجيني وانتظر صبح وعشيّه .. وماتجيني وما تقول وكنت دايم انتظر
و كنت ما ازعل ابد رغم اللي فيني من أذيّه .. ماكنت أشيل بخاطري وماكنت حتى أفتكر
والسبب كنت أعتقد بس اني لك وانته اللي ليّه ..وماتصدق لو اقولك كنت انا فيك أفتخر
كنت اقول لناس هذا والله مافي حد زيّه .. طيب وافي عسى الله يحفظه من كل شر
هذا ربي جابه لي من بعد حرماني هديّه .. اللي في جيله نجوم وبينهم هو قمر
هذا أصلا ماهو ورد هو في عيني المزهريّه ..حاضن إحساسي بدينه وأجمل أنواع الزهر
هذا ماهو شعري لالا هو حروفي الأبجديّه .. يوم اشوفه كيف مدري فجأه يكتبني الشعر
هو حياتي وهو مماتي والليالي السرمديه .. أبسط احلامي اشوفه مره وحده بشهر
ومن كثر ماكنت اسولف حسو العذال فيّه .. تقربوا منك شويه شويه بأسلوب المكر
عني قالوا من ورايه أن انا فيّه وفيّه ..وأستغلوا بعدي عنك لما أشغلني السفر
قربوك وضحكوك وعاملوك بسؤ نيّه .. يظهرون الطيب لكن هم خفو عنك الغدر
درسوا الموضوع وحطو خطه يا هي نرجسيه .. وبالفعل نجحو في خطتهم ولا عندك خبر
وغلطتي إني معك ماكنت أعيش بواقعيه .. كنت تامرني والبي حتى لو صعب الامر
كنت تتغلى وتتدلع وتتمادى عليه .. وكنت انا دايم على شوفك ابد مالي صبر
من تقول ابغي اشوفك طار كل الكون فيّه .. انسى كل الناس واجي لشوفتك لو بالفجر
كم تكلم عني هذا وذاك وهذاك وذيه .. وكنت اطنش بس عشانك لو يقولون انتحر
في النهايه شوف غيري كيف اخذكم من إيديه .. صمت انا لأجلك غيري فيك يا الغالي فطر
ماكذب من قال والله إن هالدنيا دنيّه .. البشر انواع فيها وانته واحد من البشر
بس تدري هذه خيره لأن عندي حسن نيّه .. أستفدت أشيا كثيره واستفاداتي عشر
اولاً ما ارضى اني اقبل بدور الضحيه .. ثانياً ماسامح اللي بيوم صد عني وغدر
ثالثاً ماعاد تغريني انا اي جاذبيه .. رابعاً لو جيت أحب لازم أنا أحب بفكر
خامساً ماحب أبد انسان حبني لو شويه .. لو يبيني صدق احبه فيني لازم ينتحر
سادساَ ماسامح اللي زل وأهداني الخطيه .. سابعاً ما اسهر لأي حد لي وقت الفجر
ثامناً لازم عطايا بس على قد العطيه .. تاسعاً الحب اصلا بين خلق الله ندر
عاشراً ماحد يبقى غير نور الله وضيه .. هذا نذري ويشهد الله اني راح اوفي النذر
ومن قبل ما اروح ودي تسوي بس شيئين ليّه .. اذكر انه مافي حد غيري يحبك هالكثر
ودي لو أنك تقارنهم بعد ما أروح فيّه .. وانت شوف الفرق وقارن وانته حدد بسعر
منهو اغلى ياترى هم ولا انا ولا سويّه .. انته أحكم وانته فاهم وطبعاً انت كلك نظر
يا عسى هالبعد خيره وعيشتك دايم هنيه .. اما انا ماقول إلا الحمدلله والشكر
دام هالعذال ما قصروك لا فيك وفيّه .. فرقونا عن بعضنا وقنعوك ان القدر
ابتعد عني ولا اعتب ولا تعتب عليّه .. خلني مثلك اخدع احساسي واقول ان القدر
ابتعد عني يا محبوبي وانا ببقى هنيّه ..وهاك خذ ماضيك كله وذكرياتك والصور















القيامه

صرت أحس إن القيامه أقرب من رموش عيني .. وصرت أحس ان بقى لي بدنيتي كم من شهر
ويوم أسأل يا ترى شلي أخذته من سنيني .. أكتشف وبكل أسف خسران أنا بلمختصر
وين ذولاك اللي في عمري حسافه وأنا ويني .. ليش أنا ليحين ضامي وغيري يغرف من البحر
ليش انا ماني موفق ليش هم الدنيا فيني .. أبتسم لناس وأضحك وأنا ميت من القهر
ليش صار ابسط طموحي اني بس ارد ديني .. ليش مافكر في نفسي حالي من حال البشر
إيه والدنيا متاع وضحكتين ودمعتيني .. وإللي باقي ماهو كثر اللي مضى من هالعمر
لو وقف مستقبلي يا صاحبي بينك وبيني .. والله لأختارك ولو مستقبلي مجد وفخر
كيف ما اختارك مدامك صرت ثالث والديني .. وكيف ما اختارك مدامك صرت لي لذة عمر
يكفي اني قربك أعرف قيمتي وأكبر في عيني .. ويكفي اني قربك أشعر أني دايم منتصر
هذا وانته مو بيديني كيف لو كنت بديني .. بس على كل حال اقول الحمدلله والشكر
ما ابي غير أني احشر واخذ اعمالي بيميني .. وما ابي غير الله ينجي قلبي من ضيق القبر
وما ابي غير الله في وقت الصراط انه يعيني .. وما ابي غير الله يفرج كلما ضاق الصدر
صرت احس ان القيامه اقرب من رموش عيني .. وصرت أحس انه بقالي بدنيتي كم من شهر
ودام انا للحين عايش بس بتفاخر بديني .. وبأذن ربي راح البي وقت آذان الفجر
مابفوت أي ركعه يا عسى ربي يهديني .. العشى والمغرب وحتى العصر ويا الظهر
لين ماتطلع على وجهي سمات الصالحيني .. ودي بهيبة عمر ودي بتقوى ابو بكر
باقي آخر امنيه يارب برفع لك إيديني .. من بعد ما أموت ربي الهم اخواني الصبر
يا عساي اموت في مسجد وانا من الساجديني .. والقى نفسي برحمتك بالجنه مع خير البشر










صبرت

صبــرت وقلت أكيد الوقت يرده..مصيره يحس باللي ضاع بعـده
أكيــد اليوم أو بكره بيجينـــي.. ومــــر اليوم وبعده واللي بعـــده
ولا جــــاني وأنا اللي ما نسيته.. تناسى صاحبي عهده ووعــــده
بعد حبه تناساني و نسانـــــي.. وتمادى حيل في بعده وصـــــده
شسوي ما قدرت فيوم أنسى..حنــــانه والمحبـــــه والمــــوده
هــــــذاك اللي إلى مني ذكرته..تهل أمطار عيني ع المخـــــــده
إلا من لاح طيفه في عيوني .. نسيت اني انا عايش في شده
وإذا تراولي طيفه يوم يضحك .. عرفت الشمس مشرقها في خده
جمال فيه لا ماهو طبيعي.. مثل قطر الندى من فــــــوق ورده
جفاني من بعد ما هو هواني.. وغير خط سيره صار ضــــــده
سقى الله يوم أقول أبغي أشوفك..يقول إقرب وأجي له لين حده
أجـــي له وقت ما ودي أجـــــي له.. ولا بيني وبينه أي مــــده
و يسولف لي وأنا أطالع عيونه.. أبتبســـــم و أنا ما فيني شــده
أخاف عيوني تنطق من حلاته.. ويفز القلب كلما صد صـده
عليه اسلوب يا الله يذبح ..تقل بيني وبينه حرب رده
إذا حزنان حزني كان منه.. إذا فرحــــان هالفرحـــه بيــــــده
اصد يمين القاه بيساري .. اصد يسار يذبحني بعنده
اذا سولفت يسكت ماتكلم .. واذا تكلمت يعاندني بشده
إذا شــــديت أرخى هو معايه..وإذا أرخيت يرجع هو ويشـــده
أســــد البـــاب يفتح باب ثاني .. ولما أفتحه يرجع يســـده
إذا اعطيه ورده ماياخذها مني .. وعقب نص ساعه هو يهديني ورده
يمازحني يا حلو المزح منه.. فـــــــديت أمه و أبوه وجد جده
ويعاملني مثل أصغر إخوانه ..يــــــأكلني ويشـربني بيــــــده
وهو والله الوحيد اللي بحياتي.. إذا إتبسمت يعني كنت عنـــــده
كـــــذا فجأه تغير في طباعه..و كأني علةٍ طاحت في جبـــــــده
تثيقـــــل من بعد ما كان طيب .. و كل ما أطلبه شي يـــــــرده
ابعرف ليه انا شسويت يعني ... ابعرف ش الذي ع البعد حـده
وش الذي يجبره يقسى ويبعد ... علامه صار واصل مني حـده
ياويلي ماحصل تقصير مني ... ياويلي كيف انا بعيش بعده
اذا ناوي تحداني في بعدك .. دخيل الله تكفى لاتحده
لأني ماني قدك بالتحدي... ولا تحط راس شيخ براس عبده
لا تظلمني و أنا عبد في إيدنك.. وأنته الشيخ خل سيفك في غمــده
وربِ رحمته سبقت عذابه .. دخلت بوجه ربي لا ترده
أبي لحظات بس خلني أشوفك .. بعدها روح ولا تطري لي رده
وكـــــل ما أخــــطر ف بالك .. بعدها تذكر الوفي لخله مـــرده
أبي تضحك إذا زارك خيالي .. و تذكر عاشقك وشلون عـــده
تفنن كيف و أبدع في كفايه .. كتبها لين دمعه بل خـــــــده
كفايه صار لك شهرين غايب .. متى ترجع ترى ماباقي مده
حبيبي هالعمر يمشي بسرعه .. وكل إللي بنيناه لاتهده
انا عندي امل ترجع وادعي .. عسى الله يحننه قلبك ويـرده
أخاف أموت من شوقي في غيابك .. وإذا أني مت باب الوصل ســده
وتذكر أول أبيات القصيده .. ورددها بعد مده ومده
صبــرت وقلت أكيد الوقت يرده..مصيره يحس باللي ضاع بعـده
أكيــد اليوم أو بكره بيجينـــي.. ومــــر اليوم وبعده واللي بعـــده















اخويه

تدري لو ماكنت أخويه وأغلى وأقرب شخص عندي ... كنت بحيا طول عمري و كل حياتي في غبينه
لكن الله يوم جابك جاب لي كل فرحي وسعدي ... وأمتلى هالبيت شيئاً كنا قبلك فاقدينه
أذكر اول مره شفتك يوم أنا شلتك بيدي ... كنت احاسب كأني شايل بين إيديني ياسمينه
أبتسمت وقلت ياربي على هذا الأفندي ... مخلي الناس بشماله وماخذ الزين بيمينه
ما الومه نسخه مني عيني وخشمي وخدي ... ولا هو أكثر وسامه حتى هو أكثر سكينه
من هذاك اليوم لين اليوم ماقد صار ضدي ... هو معايا لو جميع الناس ماهم منصفينه
حتى يوم انه طفل عاملته كأنه شخص قدي ... لا حشى مافيه فارق كان مابيني وبينه
كان معاي محل ماروح أخذه وأودي ... لين صاروا يسألوني عنه سكان المدينه
لو في مره رحت دونه ربعي لعنو جد جدي ... ليه ماجبته معك يا زين قعداته يا زينه
ويوم هو سافر دراسه صرت أنا عايش لوحدي ... قلبي من بعده حزين وروحي من بعده حزينه
اللي يسليني في غيابه صورته في البوك عندي ... لا وربِ صورته في القلب فيها من حنينه
مستحيل ابكي في غيابه ع المفارق ولا بعدي ... لأن يوم ابكي دموعي تنهمر من وسط عينه
كل مايطري في بالي قلت يا الضيقه تردي .. وكل ما اذكر خياله قلت الله لا يهنيه
وكل ما اذكر ضحكته وهي والله اغلى شيء عندي ... تطري الفرقى علي واقول يارب تعينه
تدري يوم الله جابك جاب لي فرحي وسعدي ... وأمتلى هالبيت شيئاً كنا قبلك فاقدينه
وتدري لو ماكنت اخويه واغلى واقرب شخص عندي .. كان ماتلقاني شاعر فيه ماتوا معجبينه













مشكله

مابقى في هالدنيا هذه شيء واحد اخسره .. من بعد ما انا خسرتك كل شيء بعدك يهون
والله لو أخسر حياتي من بعد حبك ترى .. عادي جداً يا حبيبي خل يكون إللي يكون
ليه عايش ؟ والله مدري ليه عايش يا ترى .. وانا كلما فيني ميت حتى مدري من أكون
من أنا ؟ وين المشاعر ؟ وين إحساسي سرى ؟ .. وين حبي وين شوقي وين ودي والشجون
وين ذاك الطايش اللي باع في الدنيا وشرى .. وين ذيك الشاعريه وين كل ذاك الجنون
وين قلبي مدري وينه وش حصل له وش جرى .. أذكر انه كان طيب مخلص ووافي وحنون
مدري والله لو نسيته أو بعدني أذكره .. راح وخلاني لحالي بين كل هذه الطعون
كل شيء في الدنيا يبرى إلا جرحي مابرى .. كلما له الجرح يكبر كم بداري كم بصون
مشكله لا صرت كاتم جرح محدٍ بك درى .. لو خفيته وسط قلبك تفضح الجرح العيون
ماكتمت الجرح خوف ولا كتمته مكابره .. ولا خايف من الشماته ولا خايف من الظنون
والله ماهمني الحكي ولا الضحك والمصخره .. اللي يحكي خله يحكي واللي يجرحني يمون
كل من يحكي عليه من ورايا أعذره .. وصرت استغرب من اللي من ورايا يسكتون
اشكر اللي قالي عني اي حاجه اشكره .. المهم أنه تكلم والحكي أصلا فنون
تكسب أي انسان ممكن بالحكي أو تخسره .. والحياه كسب وخساره كيفهم خل يخسرون
فرصه جتكم يا العواذل واستغلوها ترى .. الحياه فرصه وإذا راحت عليكم تندمون
صرت اشك حتى بنفسي بعد كل إللي جرى .. وصرت اشك أكثر بعد باللي امامي يضحكون
ما أثق بأقرب قريب و لو هو عمله نادره .. والله ماهمني لو أنهم من كلامي يزعلون
مابقى في قلبي محل لا للزعل ولا شره .. اللي يزعل خله يزعل واللي يشره يشرهون
يزعلون أو يشرهون ما حس ما سمع ما أرى .. ما بفتكر فيهم ابد لو يشرهون أو يزعلون
مايهمني من يحبني ومايهمني من كره .. دام عمري صار ماله ريحه أو طعم ولون
والله ضحكني كلام في شفاةً حايره .. يوم قالوا العفو في المقدره دايم يكون
روح يا عمي دخيلك اي عفو اي مقدره .. هو بقى فيها عفو او مقدره لا يا حنون
لا تظن هذا الحكي يومي اقوله مفاخره .. لا وربي بس هذا الواقع إللي توصفون
لا حشى لا ما ابالغ او كلامي به ترى .. هذا هو الحق لو انكم تبون أو ماتبون
حكمه وحده في حياتي وأعتبرها صادره .. من تجارب شخص عنا بس مدري من يكون
العدو لالا تخافه فيوم ولا تحذره .. خاف وأحذر من حبيبٍ او قريبٍ لك يصون
العدو لا مايخونك من أمامك تنظره .. والحبايب والقرايب من ورى ظهرك تخون
واللي يفاجأك بغدر لاتحاول إنك تغدره .. أسكت وخله في ناره خل تذبحه الظنون
والله لو تسكت بيجن ويثور وانته وبتقهره .. والأنتقام أصلا حلاته بكل هدوء أعصاب يكون
ماكذب من قال إن الدنيا هذه مغامره .. والبطل في كل قصه يضيع مابين الظنون
يا يموت يا يعيش بهم دوم محاصره .. نادر إللي بنهاية كل قصه يهتنون
وش بقالي من حياتي راح عمري أكثره .. بين جرح وبين هم وبين غم كله بسكون
وهذه الحاله ولا من شاف ولا به من دره .. والبشر من طبعهم في الدنيا دايم يلتهون
ضيم في قلبي و روحي صرت والله ما قدره .. ماروى ضيمي نهر ولا بحر ولا مزوون
ليه احس اني يا عالم صرت اعيش بمقبره .. كني الحالي مع انكم تسرحون وتمرحون
صرت انا للناس اشكي عن همومي اشكره ..وانا عمري ماشكيت لحد عن هم وطعون
الشاطر اللي يفهم لشعري ومابين اسطره .. بس يا حسافه وين راحو ناس كانو يفهمون
باقي في قلبي كثير اشياء بس المعذره .. لو بعبر عن شعوري خايف انكم تزعلون
بأختصار الجرح جرح كان أكبره ولا أصغره .. الحزن في القلب لا تغتر من ضحك السنون
مشكله لاصرت كاتم جرح ومحدٍ بك درى .. لو خفيته وسط قلبك تفضح الجرح العيون
ومشكله لو مابقى لك شيء واحد تخسره .. من بعد ذيك الخساره كل شيء عندك يهون













صح النوم

قاعد أشوف البيت قدامي يتهدم .. مدري شسوي وانا كل شيء سويته
خليك نايم وصح النوم يا معلم .. كيفه مادامه بدينه هوخرب بيته
هالبيت به ناس لا تعدل ولاترحم .. كلاً يحب نفسه ويعشق خصوصيته
صعبه تلاقي أحد وياه تتكلم .. ماغير صوت المشاكل بس على صيته
الأب موجود لكن كلاً ميتم .. والأم موجوده لكن كأنها ميته
أما الولد كل دقيقه ولحظه كأنه يتحطم .. كل ليله يتمنى مايصحى من مبيته
والبنت تبكي من الحسره وتتألم .. تقول شوف أصبعي وشقد عضيته
والمشكله لو شكو مافي أحد يهتم .. الأم فشلت وأبوهم هذه تربيته
حاولت أصلح خطا هالبيت وأتعلم .. لقيت نفسي بدل مابنيه هديته
لو الله يصلح مابين الأب ويا الأم .. ساعتها يمكن ترد البيت أهميته










الرنه الجديده

بكل حسن نيه طلبته أسمع الرنه الجديده .. لأنها عجبتني بصراحة فيها احساس جديد
وقال والله أنته تامر والله تبغي تعيده عيده .. لو تبي ترسلها أرسل قلت: عادي قال أكيد
أنته تستاهل عيوني جت على رنه زهيده .. هذا هو الجوال عندك بس ترى مابه رصيد
قلت أدري يا الذكي بلوتوث ما ينقص رصيده ... قال أدري بس امزح لا تدقق يا العضيد
ويوم خذت جواله منه روحي كم كانت سعيده ... لأنه أغلى الناس يمي و أنا في قربه سعيد
أهو يدري كم أحبه و كم أعزه وكم أريده ... يبقى يمي لين موتي من عقب عمر مديد
هذا أغلى الناس أصلن هو خوي قلبي وسيده ... هذا بس اللي أعاني لو بعد عني بعيد
اهو يدري بالأغاني كل جديد أنا أًصيده ... كيف لو هالرنه كانت من غنى عبدالمجيد؟
أنا هالمطرب مجنني بقديمه وبجديده ... أصلن إحساسه يجنن من قديمه والجديد
المهم أنه عطاني وخذت جواله من إيده ... كنت ناوي أسمع الرنه و أستطرب و أعيد
فجأه رن جواله بإيدي وهالرقم كني أحيده ... ياترى خالد أو أحمد لا أظن أنه سعيد
ويوم أنا دققت أكثر بالرقم ارتجفت إيده ... قلت له وأش فيك خايف و أنته من لحظه سعيد؟
قال لا لا عادي والله بس ألهتني الجريده ... كل ابو هالأخبار ضرب وقصف تهديد ووعيد
ثم طرى شخص (ن) ع بالي خلى نيراني وقيده ... انفجر دمي من عروقي وجف فيني الوريد
قلت هذا اللي بالي ؟ وكان هو يقرى الجريده ... قلت له أنا قاعد أكلمك ولا أكلم حديد؟
قال لا تظلمني والله ما ظلم خلقه وعبيده ... قلت أنا أسألك وجاوب مالك ومال العبيد؟!
قال لا لا هذا سالم رقمه يشبه اللي تحيده ... قلت له ممكن أجاوب قال جاوب لو تريد
وقلت في قلبي أخاف إني ظلمته لأنه سيده ... ما يلف يمين ولايسار وكلن له شهيد
ويوم أنا جاوبت فعلا إكتشف أنها مكيده ... هذا نفس الشخص ياللي قلت له خله بعيد
لا تكلمه هذا أعرفه كل طباعه مو حميده ... لو طباعه مو حميده يعني اهو اللي حميد؟
ضاقت الدينا في عيني وخانت لساني القصيده ... توني كنت ناوي أسمعه من قصيدي شي يديد
شي أنا قلته عشانه وكنت في مدحي أزيده ... طاح شعري من عيوني وماتت أبيات القصيد
إلا هذا إلا هذا ما هقيته يذبح أحلامي بإيده ... إلا هذا ما هقيته يكون عربيد ورغيد
لعنبو كنت أنصحه ويقول تم للي اريده ... وكان يأخذني على قد عقلي و أنا عقلي رشيد
كنت أظن انه ملاك وعارف دروب (ن)تفيده ... وإكتشفت أن النصيحة في اللي مثله ما تفيد
لا نفع فيه الكلام ولا يفيده ويستفيده ... قد ما كنت أنصحه مو ناوي أنه يستفيد
دام ما تقدر تنقص همي ياخي لا تزيده ... ولا ما ترتاح يعني إلا لو همي يزيد
اللي حز في قلبي إني كنت أبا أسمعه قصيده ... امدحه فيها و أقول فدنيتي أهو الوحيد
بس شسوي دام خانتني في وصفك هالقصيده ... الله لا رد الأغاني والله لا رد القصيد
كنت كاتب في القصيده أنه هو دانه فريده ... وللأسف لا فيه دانه ولا بعد شي فريد
حلوه هالرنة إعجبنتي كشفت أشياء عديده ... بس ما بخذها منك نفسها عند بو وليد
خل هالرنه معاك شكراً وفرصه سعيده ... وهذه من عندي بطاقه عب جوالك رصيد












هذا مكاني

بين هم وبين الم هذا مكاني الله خالقني عشان اني اعاني
العمر يمشي وأنا بالحالي واقف واعتقد اني بزمن ماهو بزماني
حتى أهلي حتى اصحابي وربعي صرت احس اني معهم شخص ثاني
لازم اجامل عشان اكسب رضاهم وابتسم واضحك ولو ضحكي ثواني
والمصيبه وين انا والضحك وينه بيني وبينه مسافات ومواني
كيف اضحك وانا من سنتين ميت مابكاني حد بس واحد بكاني
ذاك ياللي يوم اشوفه كنت افرح لأني ادري صدق من قلبه هواني
اذكر انه كان وافي كان طيب ماشكيته لحد ولاعمره شكاني
واذكر انه كان مذهل في جماله واذكر اني كنت في حبه اناني
واذكر انه كان هومالي عيوني من جميع الناس إحساسه كفاني
واذكر انه كان يحفظ كل قصيدي وكان هو بذات يحب موت الأماني
واذكر انه كان يامرني والبي يمشي امره لو طلب اصغر أخواني
وأذكر اني كنت احبه موت والله مانسيته في يوم ولا عمره نساني
لكن الأقدار كانت حيل اقوى مامداه يعيش قربي ومامداني
راح وخلى الدنيا واللي فيها كلهم وماكذب من قال ان العمر فاني
راح وخلى في قلبي اجمل ذكرياته ضحكته وطيفه وخياله وشيء ثاني
راح وخلى دمعي باين في عيوني ومنهو بعده يقول صح الله لساني
من بعد ماراح منهو اشتكي له ياعذابي يا مصابي يا هواني
كم سهرت الليل اكتب له قصايد ولعيونه كنت انا أألف اغاني
من بعد ماراح يا ثقل القصايد مابقى فيها من بعد عينه معاني
الله ياربي عسى يغفر ذنوبه وأعظم ذنوبه هوايه مع حناني
ادعي الله يا عسى الفردوس داره ويا عسى يكون في الجنات هاني
العمر يمشي وأنا بالحالي واقف واعتقد اني بزمن ماهو زماني
بين هم وبين الم هذا مكاني الله خالقني عشان اني اعاني










خليتني ارحل


خليتني أرحل من بلاد لبلاد .. كله عشان انساك واثرك معايه
حاولت نسيانك ثواني ولا فاد .. كثر السفر مايبعدك عن مدايه
أشوف وجهك بين مليون مرتاد .. والمح عيونك في عيون المرايه
مما بنفسي عافت عيوني الرقاد .. والحلم ضاع وفرقتنا وشايه
عيشتني في غربتي هم وسهاد .. وضيعتني مابين ياسي ورجايه
كثر الغلا في ناظري فاق الأبعاد .. ونزف الجروح بداخل القلب غايه
ليتك تشوف الجرح وشلون يزداد .. وليتك تحس بشيء داخل حشايه
وليتك معي لأنك دوى القلب وضماد .. ياويل حالي آه ليتك معايه
شفني بدونك صرت ع البعد معتاد .. يائس وحيد ومدري وين النهايه
بكيت وبكيّت البشر والشقى زاد .. وشلون بعدك ببتدي من البدايه
في كل لحظه من العمر هاك ميعاد .. لو فرقتنا ظروفنا يا غلايه
تبقى بلادي وما ابي غيرك بلاد .. مهما تناسيتك أحسك معايه



منقوووووووول
ولا تنسون التعليق اوك

اشكرك جمال بكبرياء علئ المرور المعطر بالعبارات الجميل

الله يافيك

الله يعافيك** رنوه

العفو

طرح اكثرر من رآئع

راق لي كثيير

مننحرم

ولگ تعطر التحيات